مقامات تاجیکستان اعلام کردند که در پی یک رشته حملات مرزی از سمت افغانستان به خاک تاجیکستان، طی یک هفته گذشته، پنج شهروند چینی کشته و پنج تن دیگر زخمی شدهاند.
به گزارش رویترز، سفارت چین در شهر دوشنبه با تأیید این خبر اعلام کرد که اتباع و شرکتهای چینی باید «فوراً» مناطق مرزی را تخلیه کنند.
این سفارتخانه روز گذشته خبر داد که گروهی از شهروندان چینی در نزدیکی مرز افغانستان هدف حمله مسلحانه قرار گرفتند.
دو روز پیش از آن نیز تاجیکستان گزارش داده بود که در حملهای دیگر که با استفاده از پهپاد و رهاسازی نارنجک انجام شده، سه شهروند چینی جان خود را از دست دادند.
مقامهای تاجیکستان پیشتر درباره حضور قاچاقچیان مواد مخدر و معدنکاران غیرقانونی طلا در نواحی دورافتاده مرزی هشدار داده بودند.
وزارت خارجه طالبان هفته گذشته، بدون اشاره به عاملان مشخص، گروهی «ناشناخته» را مسئول این ناامنیها دانسته و تأکید کرده بود که آماده همکاری با تاجیکستان است.
دفتر مطبوعاتی رئیسجمهور تاجیکستان اعلام کرد که او روز دوشنبه ۱۰ قوس (۱۰ آذر) با سران نهادهای امنیتی جلسه ویژه برگزار کرده و دستور داده است که اقدامات قاطع و مؤثری برای «جلوگیری از تکرار حوادث مشابه» اتخاذ شود.
او در بیانیهای «اقدامات غیرقانونی و تحریکآمیز» را محکوم کرد و خواستار تقویت فوری خطوط امنیتی مرزی شد.
تاجیکستان، کشوری کوهستانی با حدود ۱۱ میلیون جمعیت، روابط پرتنشی با دولت طالبان دارد.
